МИНГ ЙИЛЛИККА ТАРАДДУД
Жорий йилнинг 26 майида ЎзР Фанлар академияси Хоразм Маъмун академиясининг 1000 йиллигига бағишлаб, республика илмий анжуманини ўтказди. Ушбу тадбирни ташкил этишда Абу Райҳон Беруний номидаги Шарқшунослик институти ҳамда бошқа бир қатор илмий муассасалар яқиндан ёрдам кўрсатдилар.
Илмий анжуманни Фанлар академияси вице-президенти С.С.Ғуломов очиб, сўзни Фанлар академияси президенти, академик Ш.И.Салиҳовга берди. Нотиқ ўз нутқида Ўзбекистон Вазирлар Маҳкамасининг Хоразм Маъмун академиясининг 1000 йиллигини нишонлаш тўғрисидаги қарори ва мазкур юбилей ЮНЕСКО иштирокида ўтиши буюк аждодларимиз яратган бебаҳо илмий меросни янада кенг ўрганиш ва келгуси авлодларга етказишда муҳим тадбир эканлигини таъкидлади. Бу борадаги ишлар кўламини янада кенгайтириш ва уларни энг юқори савияда амалга ошириш ғоятда муҳим ва масъулиятли вазифа экани яна бир карра уқтирилди.
Фанлар академиясининг илмий тадқиқот муассасаларида Хоразм Маъмун академияси 1000 йиллигига тараддуд масалалари айни қизғин паллага кирди. Тадқиқотлар натижасида маҳсус монография ва бир қанча рисолалар ва кўплаб мақолалар чоп этилди. Ўзбек, рус, ва инглиз тилларидаги махсус альбом тайёрланяпти. Тошкент Халқаро Вестминистр университети билан ҳамкорликда тайёрланиб, ушбу мавзуга бағишланган мультимедия анжуман иштирокчилари эътиборига ҳавола этилди. Хоразм Маъмун академиясига бағишланган ҳужжатли фильм суратга олинмоқда. Хоразмда эса кенг миқёсдаги ободонлаштириш ишлари олиб борилиб, Хоразм Маъмун академиясининг тарихи ва бугунги кунини акс эттирувчи янги музей ҳам бунёд этилмоқда.
Ялпи мажлисдан сўнг анжуман иштирокчилари “Хоразм Маъмун академияси олимларининг илмий мероси” ҳамда “Хоразм ва унинг Марказий Осиё маданияти ривожидаги ўрни” шўъбаларига бўлиниб, ўз ишларини давом эттирдилар.
Анжуманда Хоразм Маъмун академиясининг ташкил топиши, унда фаолият юритган алломалар илмий мероси, Хоразмнинг кўҳна тарихи, ҳамда ЎзР Президенти қарорига биноан 1997 йил қайта тикланган Хоразм Маъмун академиясининг бугунги кундаги фаолиятига оид ўттизга яқин илмий маърузалар тингланди.
Мажлис сўнгида маърузалар бўйича қизғин мунозаралар бўлиб ўтиб, Хоразм Маъмун академияси юбилейини муносиб кутиб олиш учун зарур хулосалар қилинди.
